MIRI – Lebuh duduk ba enda kurang ba 10 iti kedai kupi ba Miri ari enam enggau ari minggu arinya, 26 enggau 27 aribulan 3 2011, mayuh amai bala ke dudok dia berandau bekenang ke politik enggau pengawa bepilih.
Utai ke ngerindu ke ati aku, bala ke ngirup dia pupu bansa – Melayu, Kedayan, Cina, Melayu, Melanau, Orang Ulu enggau Iban – bela megai surat khabar – Borneo Post, The Star, New Straits Times, Utusan Sarawak, Borneo Post, Berita Harian, Utusan Malaysia, Sin Chew Daily.
Sida tok bela gagit berandau senentang isu, chalun enggau bagi kerusi BN alah.
Anang ngemeli ka analiss kedai kupi
Kemayuh agi bala ke ngirup dia, ngelui umur 50 taun – kedua udah pincen gawa ba upis perintah enggau pribet. Sebengkah gi ngereja pengawa dagang enggau gawa kediri. Nya alai, penemu enggau batang runding sida enda sebaka. Bala ba kedai kupi berani agi alu silik, ngemantai ke isu ke selalu nanggol sida, enggau nasit anak uchu sida dudi ari. Sida tok berani bejako, nadai utai dikenakut.
Analisis sida enda tau enda didinga, dikumbai utai sengapa. Laban, ari bakanya meh kitai nemu nama utai ti nyadi. Nambah ka nya, sida tok urang ke ngundi ba sitak Kunsil Nengeri (DUN).
Miri ngembuan lima DUN, Bekenu, Lambir, Pujut, Piasau enggau Senadin. Bekenu enggau Lambir dipegai Parlimen Sibuti (Ahmad Lai Bujang) ari BN-PBB, tiga agi kerusi ianya Pujut, Piasau enggau Senadin dalam Parlimen Miri, (Datuk Peter Chin) ngari ke parti BN-SUPP.
Lima pengari ari DUN tok sama begempong, enggau julok ati deka ngemansang ke Miri ngagai tikas ti maju dalam semua pekara – infrastruktur, ekonomi, peluang pengawa, pemanah pengidup, pengelikun enggau sekula.
Nasit lima kerusi ba Miri
Maia bepilih 2006, BN menang semua kerusi. Bekenu bulih peratus urang ke ngundi 57.02 peratus ari penyampau 10,095. Chalun BN ari SPDP, Rosey Yunus ka kala nyadi pengajar menang enggau majoriti 3,072. Ia bulih undi 4,357 ngalah ka Mohdak Ismail (Keadilan) 1,285 undi.
Ba Lambir pula, ari 11,245 pengundi, semina 52.77 peratus muai undi. Datuk Aidan Wing ari PBB, menang enggau majoriti 2,834, iya bulih 4,334 undi. Saji Samat ari Keadilan bulih 1,497 undi.
Kerusi Piasau, presiden SUPP, Tan Sri Dr George Chan Hong Nam mujor enggau majoriti undi 3,918. Iya bulih 6,573 ngelaban Ngu Hee Hieng ari Keadilan enggau 2,655 undi.
Sitak Pujut, Chia Chu Fatt ari SUPP, bulih majoriti 1,370. Ari 17,256 pemilih, semina 54.09 peratus urang muai undi. Chia bulih 6,493 undi ngalah ka Fong Fau Teck ari DAP, 5,123 undi.
Datuk Lee Kim Shin ari SUPP ka betandin ba sitak Senadin, bulih majoriti 4,799 undi. Ia bulih 7,173 undi alu Chai Chook Fui (Keadilan) bulih 2,374 undi. Ari penyampau 16,925 pemilih, semina 57.73 nurun ngundi.
Bakani gaya lima iti kerusi tok ila maia malam pemutus 16 aribulan Empat tok ila? Ulih ka George Chan, Rosey, Aidan, Chia enggau Lee ngetan ka kerusi sida? Tiga kerusi ka majoriti Bumiputera baka Bekenu, Lambir enggau Senadin angka ulih enseput, taja pan mayuh isu, tang pengundi tetap nyukong BN. Tang kerusi Piasau enggau Pujut, empai temu, tusah ka menang?
Amaika ramalan tok?
Naka ni pengamai ramalan tok? Enti sentimen bala sida ba kedai kupi ba Miri, George Chan mayuh dianu urang. Iya nemu agi nama kebuah urang udu bejako serta nganu iya. Ia nemu agi nama utai udah digaga enggau bedau digaga ngagai pengundi.
Ka amai ia, Sapit Ketua Menteri nya siko pengari rayat ti selalu betemu enggau rayat, enda bechiping ngagai semua pengundi pupu bansa serta siru ngagai sida. Sebengkah penanggol ka nuntong bala pengundi nya ukai setegal iya, taja pan kedua bepun ari iya empu.
Antara isu ka balat diperandau ianya ba senentang pengawa iya megai parti enggau nengeri, peralihan kuasa, pentadbiran enggau manah, kos idup ti majak niki, rumah, setinggan, prasarana enggau utai bukai. Semua utai ti nyadi mayuh dipadah ba media alternatif nyengkaum blog enggau portal berita.
Miri udah berubah
Semak setaun aku nadai nurun ke Miri. Terus terang aku madah, gamal Miri udah jauh berubah, mayuh insur enda baka suba. Maia besekula ba Kolej Tun Datuk Tuanku Haji Bujang pada 1976-77 suba, Miri enda besai baka kediatu. Tang, urang Sarawak maianya sigi udah temegah ati meda Miri ti chukup pegari enggau asil minyak serta gas.
Diatu aku meda pemesai Miri udah empat kali ganda ari kelia. Suba Kampung Dagang, genturong setinggan maianya udah diruboh serta dikemansang. Urang ka diau dia udah pindah ngagai Tudan.
Maianya, Miri nadai utai ngerindu ke ati, aku enti cuti diau ba Kampung Dagang. Aku agi ingat nyium mayuh bengkah bau sampah ke dibuai mensia mayuh. Tang semua utainya udah nadai agi, semina masjid lama ka agi bediri ba tengah atur pemansang nengeri Miri.
Maianya, masjid nya agi manah, tang diatu berupai udah lama, tang agi beguna baka 60 taun ti udah. Dua taun aku sekula ba Miri, chukup rindu maia bejalai, mulai ke pengingat 30 taun suba. Asai ke baru kemari aku sekula ba Miri. Aku meri puji ngagai petara alu berasai temegah, laban Miri diatu chukup mansang enggau maju.
Bandar beresi, teratur, moden
Miri siti bandar raya ti chukup likun, teratur enggau beresi, idup 24 jam, dinamik alu ngembuan aura bandar raya ke tebilang ba dunya. Semak jako, Miri manah agi ari Kuching tauka Sibu. Enti enda pechaya, uji peda maia malam ari, enda salah-salah asai ka bejalai ba Bukit Bintang ba Kuala Lumpur.
Miri negmbuan 300,000 iko mensia, enggau dua pertiga asal urang luar, nyengkaum Semenanjung. Mayuh urang datai ka ngiga pengidup ti lebih menyana ba menoa betuah – Miri.
Nambah ka nya, mayuh urang Brunei datai ke Miri maia ujung minggu, bebeli ka mayuh bengkah barang. Barang ditu jauh amai murah, pendiaun ditu selamat alu urang ditu balat rindu meda temuai.
Siko profesor ari siti universiti awam ari Semenanjung lebuh ke bisi berandau enggau aku maia ka ngirup kupi ba utel, madah ka, iya enda nyangka Miri nyau mansang, pegari enggau narit ati.
Ia ngumbai Miri tok baka Kota Baharu, Ipoh tauka Kuala Terengganu. Ba penemu urang ka suah nemuai ngagai semua bandar besai ba Malaysia enggau bandar besai ba dunya luar, urang Miri enda tau enda temegah ati enggau bandar raya sida.
* Penulis ialah pensyarah kanan di Universiti Malaysia Sarawak
Tiada ulasan:
Catat Ulasan