Suruhanjaya Pilihan Raya (SPR) ngembuan julok ati kelalu tinggi ba pengawa bepilih taun tok. Pengarah SPR Nengeri, Datu Takun Sunggah madahka, bisi penyampau 980,000 pengundi deka nurun ngundi maia 16 aribulan 4 2011. Nama kebuah SPR kelalu andal, bisi 75 peratus urang ngundi ari enam tok ila?
Enti nitihka rikod ka udah, angka tok dikira enda realistik. Kenyau maia pengawa bepilih berengkah ari 1969, penyampau urang ngundi bisi kurang. Enti maia bepilih maianya 80 peratus, penyampau urang ngundi ba taun udahnya bisi nurun. Ngambika banding, semina 75 peratus nurun ngundi maia 1974, 1979 (72.77 peratus), 1983 (72.56), 1987 (73.0 peratus) enggau 1991 (72.80 peratus).
Penyampau ngundi pemadu tinggi
Penyampau ngundi tok majak nurun ngagai 65.95 peratus maia pengawa bepilih ba taun 1996, sebedau nambah mimit 67.1 peratus maia 2001. Tang penyampau tok nurun baru maia bepilih kesembilan, ianya 63.22 peratus tauka 552,350 ari penyampau 892,537 pemilih nurun ngundi.
Maia bepilihnya, penyampau pemadu tinggi ba Asajaya, 74.99 peratus ngundi ditangkan ka paling baruh Telang Usan, 57.94 peratus.
Sarawak, ti ngembuan pemesai baka Semenanjung chukup mayuh penguji, ukai semina ngagai SPR, tang ngagai bala pengundi ka diau jauh ari alai ngundi. Ari geografi, Belaga chukup besai ianya 19,453 km persegi, ditangkanka Telang Usan 15,386 km persegi serta Baleh (12,364 km persegi). Sigi pedis isi ka ngatur lojistik, operasi enggau pengangkutan ngambika pengawa bepilih nadai penanggul.
Penguji besai
Pengawa ti dikena ngasuh rayat ngambika ngundi ukai pekara ti muntang. Enti enda pia, penyampau ka disasarka sida SPR enda ulih dijapai.
Ba pengawa bepilih kesembilan, BN bulih 341,587 undi tauka 62.91 peratus, nurun banding enggau maia bepilih ba taun 2002. Ba 2001, parti pemerintah bulih 382,137 undi tauka 71.16 peratus. Sekali tok, angka BN ulih ngetan ka penudok undi popular tauka peratusan nurun? Enti sema undi popular BN nurun, tok iti berita ti enda entu manah ngagai pemerintah.
Lenyau duit betaruh
Tang enti kitai berati ka undi DAP, undi sida majak niki lebih ari sekali ganda, ari 8.44 peratus maia taun 2011 manggai 15.3 peratus ba pengawa bepilihka udah. Prestasi PKR mega udah nambah mimit, ari 6.94 peartus ngagai 8.72 peartus. Tang undi calon Bebas berupai nurun dari 10.66 peratus ngagai 3.41 peratus.
Ba pengawa bepilihnya, ari 20 iko chalun Bebas ka betandin, 12 iko ari sida lenyau duit taruh penyampau RM105,000. Sida enda mujor bulih 1.8 ari semua undi.
Rengat tok, penyampau 41 chalun Bebas enggau betandin. Ka batang ia, chalunka amai belaban inaya chalun BN enggau parti penyakal – DAP, PKR, SNAP enggau PAS. Parti Cinta Malaysia (PCM) enggau Parti Ekonomi Rakyat Sarawak Bersatu (PERSB) ba penemu aku nadai entu meri kesan, kelebih gi baka PERSB ka enda nyikap diri empu enggau manah.
Penyampau ngundi balat nurun
Nama kebuah peratusan ngundi tinggi masa taun 1970-an ngagai 1980-an? Nama kebuah penyampau tok majak nurun sepengudah bepilih 1991? Entu kitai enggai meda penyampau urang ngundi majak nurun baruh 50 peratus. Kitai enggai pengundika mimitnya nentuka sapa pemimpin enggau perintah. Nya kebuah, nyadi tanggungjawab kitai semua nambahka penyampau enggau peratus pemilih ka ngundi.
Penyampau enda realitik
Ba penemu aku, penyampauka disadang SPR enda realistik, kelalu tinggi. Enti amai SPR ulih, reti ia kitai bulih prestasi baka 1974 suba, tok angka enda ulih laban atur dunya diatu udah jauh berubah. Penyampau 80 peratus ulih maia bepilih 1969 laban sida pengundi gagitka ngundi. Nambahka maianya, mayuh pengundi agi diau ba menoa pesisir, semina mimit aja bejalai ngagai nengeri bukai baka bandar besai tauka Semenanjung. Nya kebuah, sida nyamai agi deka ngundi.
Rayat bejalai
Kenyau ari 1990, mayuh gi bala pengundi kelebih gi sida ka bisi pelajar enggau pemandai (urang biak) bejalai ngagai menoa bukai ngiga insur serta pengidup ti meruan agi. Sida enggai diau ba menoa pesisir agi, laban nadai pengawa puang, enti sema bisi pan gaji mit. Nya kebuah sida tok liat amai ka ngemulaika diri maia bepilih.
Enti sema pulai, sapa ka nanggung belanja? Sapa sanggup muai duit beratus-ratus tauka beribu-ribu semina ka pulai ngundi? Berapa mayuh bala sida ke biak ti gawa ba Kuala Lumpur, nyanggup pulai ke Belaga tauka Kapit tauka Telang Usan labanka ngundi?
Bedau agi bekira deka ngambi pemisi enti sema pulai ke menoa. Sigi bisi atur deka nulong sida pengundi tok mulaika diri, tang nadai siti parti sanggup meri bantu meli tiket bilun ke pengundi.
Tauka penyampau peratusan urang ngundi udah balat nurun laban pemilih udah bangat pedis ati serta ringat dipangka enggau ulah politik serta kepimpinan? Ba penemu sida, nadai ga guna ngundi enti pengari ari urangka sama.
Iaka amai, pengundi patut ngena ungkup serta tanggungjawab sida enggau naka pemanah. Anang ngumbai undi enda penting. Siti undi ulih ngemai kesan enggau implikasi ti chukup besai ngagai chalun. Chalun ulih menang tauka alah. Ba pengawa bepilih Sarawak, BN kala menang enggau semina tujuh iti undi aja.
Tiada ulasan:
Catat Ulasan