KUCHING – Baka ka udah dipelaba ke aku sebedau tok, kunsil nengeri Sarawak deka bepilih maia 16 ari bulan Empat, 21 ari udah bekau Kunsil Nengeri (DUN) dipadamkan ka 21 aribulan tiga arinya.
DUN dipadamkan ngam dua bulan sebedau abis kena 20 aribulan Lima, ngambi ka pengawa bepilih ulih digaga.
Ngena amai bepilih digaga maia tok tajapan pan perintah nengeri ulih megai menoa datai ba bulan Sembilan. Tok ngelai ke perintah bisi tanggungjawab serta mereti utai dikedeka rayat.
Ba sistem demokratik, perintah ti betanggungjawab deka ngaga pengawa bepilih maia ti ngena, ukainya terus bekuasa.
Ngambi ka banding, Hosni Mubarak ba menoa Mesir, deka megai menoa ngagai bulan Sembilan 2011, tang enda mukai-mukai bala rejim reformasi enggai ka iya, alu majak deka muia iya ari eprintah. Hosni enggau naka alah deka ngetan ke kuasa, ngelaban kuasa rayat, ti ngujong ka iya nyurut ka diri nyadi Perdana Menteri Mesir empai lama ti udah.
Dun ke dipadam maia 21 aribulan Tiga tok tadi, ianya 60 ari sebedau mandat perintah megai menoa tok ambis.
Nitih ka undang-undang, pengawa bepilih mesti digaga ba kandang 60 ari dalam kandang Dun udah dipadam, baik ka 20 aribulan Lima, aribulan ti sama maia pengawa bepilih nengeri ka udah.
DUN nengeri dipadam kena 21 aribulan Tiga, ngam lima ari sebedau 26 aribulan tiga, ianya ari Pehin Sri Taib dipenyadi ka Ketua Menteri, 30 taun ti udah. Lumor lima reti ditu ianya, nanda ke bulan Taib ada. Ia ada kena 21 aribulan Lima.
Sigi agi pekara amai-amai ti ngerindu ke ati ianya, bepilih ka digaga 16 aribulan Empat, ianya 26 ari udah DUN dipadam. Taib berengkah enggau pengawau politik maia umur iya manggai 26 taun.
Enti kita pegulai ka 16 (ari muai undi) enggau 21 (ari pengada Taib), kitai ka bulih lumor 37 (1937), ianya taun Taib diada ke dunya.
Pengawa bepilih rengat tok ianya ke-10 ngagai Sarawak. Lumor 10 tok ngari penyampau ari kena kimpin. Enambelas (ari muai undi) dibuai 6 (ari nama ka kendidit) sebaka enggau 10.
Lumor 10 tok mega ngari ka penyampau taun ti deka datai ba 2020, endor menoa enggau bansa Malaysia udah mansang, alu ngembuan tikas idup ti chukup menyana, baik ka ba menoa nengeri tauka pesisir. Sepuluh mega ngari ka raban ba Kabinet Nengeri.
Siti narit ati ianya, maia Taib ngenatai ka gerah DUN Nengeri deka dipadam kena 19 aribulan Tiga tok tadi, Perdana Menteri enggau Sapit iya bisi datai.
Utai tok enda kala nyadi sebedau tok, ukai semina ba menoa Malaysia, tang menoa bukai ka ngena sistem demokrasi baka Kanada, India enggau Australia. Nyentok ka, Perdana menteri tauka Ketua Menteri tajapan ari parti ti sebaka, Perdana Menteri sida enda kala masuk champur ba pengawa perintah nengeri. Reti iya, Perdana Menteri ti ngari ka Persekutuan nadai kuasa ba perintah nengeri, tauka nentu ka pengawa. Persekutuan enggau kuasa nengeri dua pekara ti enda sebaka.
Pengawa bepilih rengat tok enda sebaka enggau ka udah. Suba, nyamai amai sida BN ulih menang, nadai enti mayuh penanggol enti dibanding enggau diatu. Rindu amai meda bala kedindit ti ngari ka pembangkang besatup enggau kedindit ari aprti BN.
Maia bepilih kunsil nengeri ba 2006, BN udah alah sembilan iti penudok (6 dipenggi DAP, siti PKR, SNAP enggau Bebas), tang BN Sarawak agi andal ulih sukong besai ari rayat. Tang udah pangka tsunami politik ba 2008, BN Nengeri enda ulih ngambi Parlimen Bandar Kuching ari DAP. BN mega enda ulih ngetan ka penudok ba Parlimen sitak Sibu, bekau ka udah betandin lima penjuru ba bulan Empat ti udah.
Isu ba senentang pemansang udah disebut sida pembangkang maia pengawa bepilih besai 2008, ti ngujong ka BN alah ba lima iti nengeri. BN udah alah 2/3 sukong majoriti. BN kala alah 2/3 majoriti maia bepilih besai 1969, tang udahnya BN bulih kuasa baru pengudah tiga iti parti pembangkang masuk BN maia 1970 ngagai 1971.
Bisi penyarut leboh pembangkang maia ke menang undi majoriti. Sida baka ukoi ke labuh anak, ngiga penemu dikena magi 71 iti konstituensi enggau raban parti komponen ti bukai.
Diatu, sida pembangkang nyebut baru isu lama ke dikena maia bepilih 2008. Isu makai suap, pentadbiran enda menyana, nepotisme enggau kronisme meruan nyadi isu. Sida pembangkang deka nyebut isu tok beari-ari ngambi ka rayat ingat.
Pengawa bepilih ti deka datai ia kedua penudi sebedau menoa datai ba tikas pemansang 2020. Perintah nengeri andal maia tok ila ulih nape semua ubah dunya ba perambu pemansang Score.
Menoa mansang enda tau enda ngembuan bansa ka moden. Ba rengat 2020 tok ila, Sarawak deka ngerami pengelama 57 taun udah Merdeka dalam menoa Malaysia. Nya alai, semua bengkah ba menoa tok mesti udah mujor enggau mansang, baik ka ba tusun perintah, penatai pemisi enggau sosial.
Baka ke udah dikelai – Taib madah kenyurut kediri – nya pan enti iya enda berubah runding – tok meh penudi iya enggau bepilih. Bakanya mega kedua bala raban BN ke bukai, tok meh naka sida bepilih.
Penyampau raban Kabinet Nengeri udah bekau bepilih Kunsil tok ila nyangka agi sebaka baka DUN sebedau dipadamka leboh 21 aribulan Tiga. Tang penyampau raban Kabinet Nengeri sepengudah Taib ngeleka ka jawatan nyadi Ketua Menteri udah pengawa bepilih, angka enda sebak.
Gagit ati ka meda bala rebak baru Dun ka terus dipenyadi nyadi Menteri Kabinet!
*Penulis siko Pensyarah kanan Fakulti Sains Sosial, Universiti Malaysia Sarawak.
Tiada ulasan:
Catat Ulasan