Leboh maia diinterbiu Suhaimi Sulaiman aba rancangan Bepilih Ke-10 Sarawak saluran Astro-Awani jam 8.15 malam, 21 ari bulan Tiga tok tadi, ia bisi nanya ba senentang; bakani gaya pengundi ari urang biak tauka rebak baru maia bepilih ila. Amai sida ke biak dalam agi deka ngundi permbangkang?
Enti amai, nama kebuah sida ngembuan runding politik bakanya? Ia ka amai, sida kebiak tauka rebak baru megai kuasa baru dalam dunya pulitik kediatu enggau jemah ila.
Kediatu, bisi 310,000 pengundi biak ba menoa Sarawak, ianya 33 peratus dari 950,000 pengundi ba menoa tok. Nitih ke pechah bansa, pengundi biak bansa Cina (100,000 iku), Melayu (70,000 iku), bumiputera ke bukai (140,000) enggau pupu bansa bukai bisi nya datai seribu iku.
Enggau silik agi, penyampau 73 peratus pengundi berumor 21 ngagai 30 taun, alu laluh ia beumor 31 ngagai 40 taun.
Enda ulih dikemeli enggau slugan serta danji manis
Runding enggau utai ke diguna sida pengundi kerumpas entu enda sebaka enggau pengundi ketuai. Pengundi biak ngembuan pelajar ti tinggi, landik, sikar serta ngembuan runding ti kebukai– sida ke tuai angka enda nemu nama utai dikedeka urang biak.
Ukai nyamai ke ngemeli tauka nundi sida ke biak enggau slugan pulitik tauka jako manis.
Sida ke biak, enda tau enda dipadah enggau manah, chukup silik enggau penerang ti amai alu ulih ngasuh sida arap. Anang bedanji sengapa enti asai ia enda ulih ngereja. Laban sida tok nemu alu ngembuan runding ti silik ba pulitik, nya alai semina wakil rayat ke ngembuan ulah ke manah dikerindu ke sida.
Pengundi biak deka milih chalun ti ngembuan perangai ulih ngemai serta ngiring rayat enggau manah. Sida enggai amai meda pemimpin ke gila kuasa enggau reta tengkira. Ba penemu sida, pemimpin patut nemu nyagam asai ati rayat. Sida deka meda, wakil rayat nemu bekaul, begulai, mending ka penanggol enggau isu ti ngenusah ke sida.
Isu ke malut sida pengundi biak
Mayuh amai isu ka malut pengundi biak kenyau ari diatu. Sida udah jauh runding, betati ka pengidup jemah ari, pengawa enggau penatai pemisi. Udah ka kitai mutar ka isu ekonomi enggau peluang pengawa puang ba sida tok?
Sida ka meda, mayuh gi pengawa puang ti ulih meri penatai pemisi ba nengeri tok. Sema nadai peluang pengawa ti ulih ngipak pemandai ulih sida, bakani deh sida ka diau ba menoa tok?
Nya meh kebuah sida tok bejalai ngagai menoa urang baka Lembah Kelang, Johor enggau menoa bukai, laban ka ngiga pengidup ti menyana agi. Kediatu, tusah amai kitai bisi meda sida ayan tauka diau ba rumah panjai maia siang ari. Ba sebengkah genturung rumah enggau rumah panjai, aku meda semina sida ke tuai enggau anak mit tinggal. Berasai puang amai nadai urang biak.
Pengundi biak ngembuan penemu pulitik ke tampak. Sida nemu sapa ka patut dipilih maia bepilih. Sida tok patut dikaul enggau manah, enti ka narit ati sida ambi ngundi. Anang ngasuh sida baka urang enda diguna, dibuai ke tisi, enti maia bepilih baru nundok. Sida enggai digaga bakanya. Enti dilak ka, ati sida deka bebali alu nguing ke bukai.
Begulai meh enggau sida ke biak
Sida ke biak patut dikaul barang maia, enggau mayuh bengkah chara, ukai semina maia kak bepilih. Ukai semina ngena program Festival Mesra Belia baka ke atur jam diatu. Nama utai kedeka tauka dikerindu sida tok?
Ba kimpin pulitik, angka enda entu manah ga bejako panjai tauka licha. Chara tok enda dikerindu. Baka ba Kerdau enggau Merlimau, strategi sida mayuh amai, baik ka besukan nyengkaum main bul futsal. Resia ka menang undi nadai chara bukai, ianya enggau ngambi ati sida.
Bala wakil rayat beguna ka pengawa ti ulih ngasuh ati sida ke biak rindu. Nama utai dikedeka sida? Nitih ka pejurai aku enggau bala sida biak, sida ka amai enti bisi program mayuh bengkah baka pengelandik ba kumpiter, jako ribai, nyumai, bejait, kursus kepimpinan, bejako ba mua mayuh enggau pengawa dagang.
Nabur berita
Bala anembiak rebak baru enggau pengundi ba menoa pesisir tusah amai ka bulih berita ba senentang program, dasar perintah enggau peluang pengawa puang laban ti nadai talipaun/komunikasi enggau internet. Setegal ka nadai utai bakanya, sidak seruran enda ampit berita, gerah pengawa puang enggau dasar perintah.
Nama kebuah perintah enda ngena 700 gerempung urang biak ba seluruh menoa Sarawak untuk dikena nabur ke berita? Tauka ngena bala tuai rumah enggau urang ka bisi nama ba rumah panjai tauka genturung ba endor diri empu? Bala anembiak ka landik tok enda tau enda dilatih ba kepimpinan. Enti kitai ulih ngambi ati sida tok, naka meh pemanah dunya pulitik ba nengeri tok.
Barisan Nasional Sarawak patut nangi enggau pengundi biak, kelebih gi ba pengundi bansa Cina. Angka semina 20 peratus aja sida ngundi milih BN. Sida deka mantup ke pengasai ati sida maia bepilih tok ila.
Pengundi idealistik
Idealistik, nemu berunding enggau enda mudah dikemula, bakanya meh chara pengundi biak. Bejako nyual pulitik pemansang enda diguna urang diatu. Sida enggai meda ulah pemimpin ka ngena kuasa enggau salah serta makai suap. Sida nemu nama utai ka digaga alu utau ke enda digaga perintah. Anang ngajar sida ngambi ka nemu bersyukur tauka ngani sida enggau leka jako ti ngemedis ke ati. Sida ulih malas ngena internet.
Utai ti balat ngasoh sida biak putus pengarap laban sekeda wakil rayat semina kiruh maia semak bepilih. Maia tok meh sida mantai ka penyinu enggau penyiru enggau rayat. Urang biak ke meda mua wakil rayat ke tuai diganti enggau wakil rayat ke regas enggau biak.
Angka bisi chalun biak maia bepilih tok ila? BN sarawak disadangka ngena 30 peratus mua baru maia bepilih ila. Berapa iko pemimpin biak deka dipansut ka PBB ari 10 ngagai 12 mua baru ila?
Aspirasi enggau utai dikena sida pengundi biak enda tau enda diputar enggau nyengala ngambi ka sida enda tepejuh ke bukai. Nasib BN nengeri bepanggai ba sida pengundi, enti enda maia bepilih diatu, angka maia bepilih ti deka datai ila.
*Penulis ialah penganalisis politik di Universiti Malaysia Sarawak
Tiada ulasan:
Catat Ulasan