Ahad, 27 Mac 2011

Rayat enda tau enda ngerengkun ke pengelikun Sarawak

Ulih Sarawak Monitor
Ari ngundi majak semak, kunsil nengeri pan udah dipadam. Kolumnis ba surat kabar Star ngadang ka penamaan chalun 6 April alu bepilih 16 April.
Parti recyle, SNAP udah madah ka 16 iko chalun deka betanding – nyengkaum ka kala betanding, udah alah enggau bala politik ka enda temu penatai. Presiden Edwin Dundang Bugak, siko ahli politik ka chukup tebilang tyang nadai pemujor. Ia deka betandin ba sitak Marudi, menoa bini ia, nyatup Slyvester Entri Muran, sapit presiden SPDP. Sebedau tok, Edwin Dundang kala alah dua kali ba menoa ia empu di Betong.
Nya kebuah, rayat enda tau enda ingat, kitai bisi tanggung pengawa ti berat maia ka milih perintah ba pengawa bepilih tok ila.
Berindik arinya, kita enda tau enda belajar ari pekara ti udah nyadi maia bepilih besai ba 2008 tok suba. Ambi ka banding, utai ti udah nyadi ba Pulau Pinang ka dipegai perintah DAP, Kedah enggau Kelantan (PAS) enggau Selangor (PKR).
Semua parti tok bula ka semaia, enda nitih ka danji ka meri elaun ngagai urang tuai, karan enggau karan pechuma ngagai urang merinsa ti ngembuan penatai pemisi kurang RM700. Ketuai Menteri Pulau Pinang Lim Guan Eng enggau Menteri Besar Selangor Tan Sri Khalid Ibrahim baka lalau enda ngipak ke dampa. Sida tok nadai ngembuan kualiti enggau pemanah ka nyadi wakil rakyat.
Kedah enggau Kelantan siti chunto kelia, menoa ka dipegai perintah ti enda menyana. Peda kitai Kelantan, udah bekau ka dipegai PAS dalam kandang lebih 20 tahun, agi meruan nyadi menoa paling merinsa ba menoa Malaysia.
Utai ka patut diperati enggau berat ianya, kitai enda tau enda ngasuh Sarawak meruan dikerengkun enggau likun. Kitai mesti ngembuan perintah ti manah sepengudah bepilih tok ila. Kitai enda tau masau ari, ngayah ke diri ninga ka jako bala parti guna baru (SNAP), parti besai jako (PKR) enggau parti ngati ka diri (DAP) ti semina ka menang sitak kunsil ba menoa nengeri aja.
Ketuai Menteri, Pehin Sri Abdul Taib Mahmud ia ka mega Chermin Barisan Nasional Sarawak, selalu madah, utai ka patut diperati ianya rayat patut ngenan ka kaul ti manah. Semua rayat pupu bansa enda ngira pengarap enggau penatai patut begulai enggau manah.
Enti menoa kitai selalu belaya, nadai pengelikun, nadai mensia ka bedagang enggau melabur ba mnoa kitai. Sida enggai melabur enti menoa kitai enda likun.
Ka batang ia, menoa kitai udah lama ngembuan pengerindu enggau tolak ansur. Ngambi ka chunto, ba genturung Melanau, bisi Kristian, Orang Liko (pagan) enggau Muslim, semua begulai manah, likun nadai penyarut. Bakanya mega raban Iban, Melanau enggau Cina, ari kelia begulai manah. Berindik arinya, Sarawak ulih mansang enggau maju laban ngembuan kaul ti chukup manah.

Tang ba moa pembangkang, sida ngaga jako bula madah ka perintah ngambi tanah rayat. Enda ka sida nemu, kemayuh gi tanah tok dikena ngaga jalai ti ngemai pemansang enggau penyenang ngagai rayat empu.
Enti jalai udah tembu, sapa ka senang? Rayat ga senang bisi jalai, rega tanah NCR pan niki. Sida pan ulih ngadu ka pengidup diri empu enggau manah agi. Enti rega tanah sebedau tok semina RM200 tauka RM300, reganya deka niki laban udah bisi pemansang.
Nya kebuah, kitai enda tau enda ngembuan wakil rayat ti pintar, lansik serta ulih gawa nulong rayat. Kelimpah arinya, wakil rayat nya nemu serta silik meda pemansang di deka datai.
Kitai mesti ka chakah ati nitih ke pemansang ba Wawasan 2020, enti enda kitai tinggal dudi, terus merinsa.
Penadai pemisi nengeri tauka perkapita deka nyulut, nambah tiga kali ganda kelebih gi enggau mayuh bengkah prujek Score ba 2020.
Diatu, taja pan rayat ngumbai diri empu merinsa, tang sida ulih meli ngembuan mayuh pakaian, ulih meli ekon, ngembuan entukar, tang nadai siko madah ke diri empu kaya. Bala Cina pan madah, chukup makai. Ke batang ia, nyau semak setiap pintu rumah panjai bisi anak degrii, tusah nemu nadai anak digree. Maia aku kelia suba, nadai mayuh urang bisi digree, Cina pan nadai mayuh.
Suba ba kandang 1960 – 1970an, Sarawak nadai universiti datai ka tengah taun 1990-an. Suba enti ka ngagai universiti, apai indai nganjung anak sida ngagai Australia tauka England. Diatu bala anak ulih sekula ba Bintulu, Miri, Sibu, Kuching enggau Samarahan.
Ke batang ia, sida pembangkang semina nemu bejako, ngerichau enda temu tuku. Bejako sengapa semina ka ngasa ka rayat ngambi ngundi sida maia bepilih tok ila. Tang sida enda betati deka nulong enggau mai pemansang ngagai trayat.
Kitai ulih nyadang ka, mayuh agi jako jai deka pansut ari mulut pembangkang. Sida deka datai ngabas bala rayat ba menoa pesisir lalu bejai ke perintah, ngena nama demokrasi. Sida ia meruan ngutok, madah semua utai ka digaga perintah salah, nadai sekena.
Sida tok nadai pengawa bukai, semina nemu segau-segau kin kia, ngeritok rayat, ngiga penyalah pemerintah. Bunyi ko jako urang, mulut ajak manis tang ati pait.

Tiada ulasan:

Catat Ulasan